FRIOL CELEBRARÁ O SEU OITAVO “FRIULIO” CASTREXO-ROMANO O 9 E 10 DE MAIO
O Concello de Friol presentou a próxima edición do “Friulio”, a súa festa castrexo-romana, que terá lugar o sábado 9 e domingo 10 de maio, na que participarán máis de 500 persoas e 30 asociacións de recreación histórica.
O Concello de Friol e a Asociación de Recreación Histórica “A Castronela” organizan unha nova edición do Friulio, un encontro entre asociacións castrexas e romanas que recrearán durante a fin de semana do 9 e 10 de maio os modos de vida, costumes e crenzas de ámbalas dúas culturas, e que conta coa colaboración da Xunta de Galicia a través de Turismo de Galicia.
Nesta oitava edición volverán participar diferentes asociacións castrexas e romanas chegadas de toda Galicia e tamén de outras comunidades de España, que forman parte activa en eventos de interese turístico galego, nacional ou internacional, como o Arde Lucus ou as Guerras Cántabras.
En total este VIII Friulio contará coa participación de máis de 30 asociacións de recreación histórica, música tradicional e divulgación cultural, coa colaboración das asociacións culturais de Friol, contando coa participación directa de máis de 500 persoas entre figurantes e outras funcións arredor desta festa de recreación histórica.
As actividades principais da festa volverán estar ubicadas en torno ó paseo fluvial, onde se establecerán o asentamento castrexo-galaico e o campamento romano, grandes reclamos do Friulio e poderán ser visitados desde as 11 da mañá do sábado ata as 8 do serán do domingo.
O programa de actividades inclúe desde a recreación da vida nun castro ata a elaboración do pan e queixo, desfiles de tropas romanas, ou demostracións e obradoiros de teares castrexos, fiado, textil e complementos, tiro con arco, xogos populares, gastronomía castrexa e exposición de torques. E pola parte romana tamén veremos obradoiros de medicina, cuñado de moedas e comercio.
O “Asedio ao Castro” volverá ser un dos momentos máis agardados e espectaculares do Friulio, no que se recreará o asalto das tropas romanas aos castros que existían nas terras de Friol. Outras representacións que se repiten cada ano serán as tradicionais “Escaramuza Castrexo-Romana” e o “Descenso en balsa do río Narla” o sábado pola tarde; ou a “Liorta polo Tesouro do Castro” o domingo pola mañá.
Despois de anos celebrando as “Vodas Galaicas”, unha das novidades desta edición é o acto de benvida aos máis novos, descendentes daqueles casamentos, que terá lugar o domingo pola mañá e que pon de manifesto o crecente papel que o público infantil vai tomando nesta celebración.
Todas estas actividades levaranse a cabo integramente na vila de Friol, ocupando diferentes ubicacións como as inmediacións do centro e do paseo fluvial, a avenida de Santiago ou a praza de Andón Cebreiro. Para incentivar a ambientación da vila, desde o Concello de Friol vólvese convocar o concurso de escaparatismo e fachadas entre os establecementos públicos e os balcóns das vivendas. Os premios entregaranse durante os actos de clausura o domingo a mediodía, nos que ademais terá lugar un acto moi especial, co nomeamento como “Persoeiro de Honra” deste VIII Friulio de Carlos Veiga, exdirector do Colexio Público Integrado de Friol.
A música volverá ter unha grande importancia este ano, coa actuación de diferentes grupos folk en distintos puntos da vila, como Xesta Verde, Tympana Gallaica, Son de Lugh, Bloco Meigallo ou a Asociación Cultural Xermolos de Guitiriz. Na noite do sábado celebraranse as actuacións dos grupos “La Karaband” e “Clandestinos”.

SPOT DO FRIULIO 2026: https://youtu.be/t7sfmHkmB50